Түбән Кама күппрофильле хастаханәсендә яңа җиһазда күзләргә операция ясый башладылар

2022 елның 22 марты, сишәмбе

Түбән Кама күппрофильле хастаханәсенең офтальмология бүлегендә бүген аеруча дулкынландыргыч. Катарактаны дәвалау өчен яңа аппарат - «Centurion» факоэмульсификаторы файдалануга тапшырыла. Татарстан районнарында мондый аппарат юк әле. Яңа җиһазның өстенлекләре бик күп, әйтик, аппараттагы басым датчигы ярдәмендә, операция вакытында машина үзе барысын да контрольдә тота һәм компенсацияли.