Яр Чаллының 1нче номерлы стоматология сырхауханәсенең теш табибы Гөлназ Дәүләтова 6 августта Казанда узган Беренче Бөтенроссия сәламәтлек фестивалендә катнашты. Фестивальдә йога буенча иң массакүләм хатын-кызлар тренировкасы буенча Россия рекорды теркәлде.
Казанга фестивальдә катнашырга башка шәһәрләрдән һәм хәтта илләрдән 2000нән артык хатын-кыз килде. 25 меңнән артык катнашучы әлеге чарага онлайн кушылды. Иң кечкенәсенә - биш, ә иң олысына 67 яшь иде.
Гөлназ Рәзимҗан кызы йога белән 2021 елның ноябреннән шөгыльләнә. "Мин тормышымда йога барлыкка килүемә бик шат. Ул тынычландыра, башны начар хис-тойгылардан арындыра", - диде табиб.