Узган ел республика клиник офтальмология хастаханәсендә 21 меңнән артык пациент дәваланган
13 мартта «Татарстан Республикасы Сәламәтлек саклау министрлыгының профессор Е.В. Адамюк исемендәге Республика клиник офтальмология хастаханәсе» дәүләт автоном сәламәтлек саклау учреждениесе Хастаханә Советының 2022 елгы эшчәнлек йомгакларына һәм 2023 елга өстенлекле бурычларга багышланган киңәйтелгән утырышы булды.
Хастаханә советы эшендә Татарстан Республикасы Сәламәтлек саклау министры М. М. Миңнуллин; ТР буенча Сәламәтлек саклау өлкәсендә күзәтчелек буенча федераль хезмәтнең территориаль органы җитәкчесе Л. Н. Шәйхетдинова; ТР буенча Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР буенча идарәсе җитәкчесе М. А. Патяшина һ. б. катнашты.
2022 елда клиника республика халкының күрү сәләтен саклау буенча эшнең 100 еллыгын билгеләп үтте.
2022 елда дәүләт йөкләмәсе күләме амбулатор, стационар һәм югары технологияле ярдәм буенча 100% тан артык үтәлгән, бу халык өчен офтальмологик ярдәмнең мөмкинлеген шактый арттырырга мөмкинлек биргән.
Халыкка ашыгыч медицина ярдәме кабул итү бүлегенең 3 ашыгыч офтальмология ярдәме кабинетында күрсәтелә, аларның эше тәүлек әйләнәсе оештырылган. 2022 елда ашыгыч ярдәм сорап 41 меңнән артык кеше мөрәҗәгать иткән, бу узган ел күрсәткеченнән 26% ка югарырак.
Консультатив поликлиникага узган ел ММИ кысаларында 93 меңнән артык пациент мөрәҗәгать иткән. Консультатив поликлиника базасында глаукома белән авыручылар өчен офтальмология кабинеты ачылган, глаукома белән авыручы пациентның регистры булдырылган.
Дәваланган пациентларның гомуми саны 21 меңнән артык пациент тәшкил итә, бу өч ел эчендә динамикада 30% үсеш тәшкил итә. Шул ук вакытта пациентларның 80% ы көндезге стационар шартларында күрү органнары авыруларын хирургик дәвалауның заманча аз инвазив методикаларын куллану хисабына оператив дәвалау алган.
Клиниканы цифрлаштыруны үстерү буенча зур эш башкарыла: хезмәткәрләрнең электрон цифрлы имзалары рәсмиләштерелә, АЛИСА лаборатория мәгълүмат системасы уңышлы кертелә.
Төп докладчылар чыгышыннан соң сәламәтлек саклау министры Марсель Миңнуллин учреждение эшчәнлегенә уңай бәя бирде һәм нәтиҗәле эше өчен клиника коллективына рәхмәт белдерде, Республика клиник офтальмология хастаханәсенең Татарстан халкына офтальмология ярдәме күрсәтүче төп учреждение булуын билгеләп үтте.
Һәм район медицина учреждениеләре белән кураторлык эшен активлаштырырга, «юл картасы» булдырырга һәм аерым алганда, максатчан килешү төзегән ординаторларны район хастаханәләренә җибәрүне оештырырга кушты.
Медицина советы ахырында клиника хезмәткәрләрен бүләкләү тантанасы узды.