Сәламәтлек саклау министры Марсель Миңнуллин Әлмәт хастаханәләрендә булды
31 мартта ТР сәламәтлек саклау министры Марсель Миңнуллин эш визиты белән Әлмәттә булды. Район башлыгы Тимур Нагуманов һәм сәламәтлек саклау идарәсе җитәкчесе Ренат Шакиров министрны Әлмәт районының сәламәтлек саклау объектларында озатып йөрделәр.
Алар республиканың көньяк-көнчыгышындагы 10 район хезмәт күрсәтү зонасы булган онкология диспансерында булдылар.
Әлмәт район үзәк хастаханәсендә министр масштаблы капиталь ремонт барышы һәм яңа кабул итү-диагностика бүлеге төзелеше белән танышты. Министр шулай ук поликлиниканың һәм район хастаханәсе стационарының гамәлдәге өлешен карады.
Аннары делегация Әлмәт районара күп профильле хастаханәсенә килде. Планлаштырылган югары технологияле перинаталь үзәк өчен әзерләнгән мәйданчыкны карадылар, проект һәм төзелеш сроклары турында фикер алыштылар. Реанимация бүлегендә һәм кабул итү-диагностика бүлегендә булдылар, операблокта булдылар, анда гибрид операция бүлмәсен карадылар.
Әлмәт районара күп профильле хастаханәсе хезмәткәрләренең медицина советы утырышының пленар өлеше актлар залында узды.
2022 елда «Татнефть» ААҖ һәм Әлмәт шәһәре медицина-санитар өлешенең эш нәтиҗәләре белән баш табиб Гөлсинә Шәмсиева таныштырды.
Сәламәтлек саклау министры «Татнефть» ААҖнең медицина-санитария бүлеге эшчәнлеген югары бәяләде һәм районара күп профильле хастаханә буларак, көньяк-көнчыгыш халкына медицина ярдәмен оештыру буенча стратегик бурычлар тагын да артачак, дип билгеләп үтте. Марсель Миңнуллин ведомствоның өстенлекле юнәлешләрен билгеләде, коллективларга халыкның сәламәтлеген һәм тормышын саклап калу өчен нәтиҗәле эш теләде.