Татарстан һәм Удмуртия табиблары бавыр күчереп утыртуга мохтаҗ Ижевск кешесен коткарды
Татарстан Республика клиник хастаханәсе һәм Удмуртиянең Беренче Республика клиник хастаханәсе табибларының уртак тырышлыгы 44 яшьлек ир-атның гомерен саклап калырга ярдәм итте.
Ир-ат Ижевск шәһәрендә 1нче РКБ гастроэнтерология бүлегенә кискен бавыр җитешсезлеге белән авыр хәлдә килә. Үткәрелгән дәвалауга карамастан, аның хәле бик тиз начарлана, холестаз (сары төшү) синдромы арта бара. 1 нче РКХ табиблар консилиумы пациент документларын Казандагы Трансплантология үзәгенә җибәрү турында карар кабул итә.
"Безнең пациент өчен һәр көн исәптә иде, аны бавыр күчереп утырту операциясе генә коткара алды. Бу бик катлаулы, югары технологияле күп сәгатьлек операция, зарарланган орган тулысынча алып ташлана һәм аның урынына донор органы яки пациентның туганнарыннан алынган бавыр өлеше күчерелә. Без документларны Казан коллегаларына җибәрдек, һәм көтмәгәндә аларның хәзер кан төркеме буенча яраклы донор органы бар дигән җавап килде», - дип сөйләде Удмуртия 1 РКХ гастроэнтерология бүлеге мөдире Алексей Бессонов.
Пациентны хирургларга вакытында җиткерү өчен Удмуртиядә Россия Президенты Владимир Путин инициативасы белән оештырылган «Сәламәтлек саклау» милли проекты кысаларында эшләүче санавиацияне кулланырга карар ителде. Табиблар пациентның хәлен тотрыкландырды һәм аны Казанга җибәрергә әзерләде. Санавиация вертолеты белән анестезиолог-реаниматологлар бригадасы озатуында 6 сәгать эчендә ир-атны Татарстанның Республика клиник хастаханәсенә алып килделәр. Шул ук көнне аңа уңышлы трансплантация операциясе ясыйлар. Хәзер ул инде канәгатьләнерлек хәлдә һәм амбулатор дәвалауны дәвам итә.
"Бу очракта пациентны коткарырга барлык табиб – хирурглар, гастроэнтерологлар, реаниматологлар, санавиация белгечләренең бердәм тырышлыгы ярдәм итте. Бавыр күчереп утырту буенча операцияләр бик сирәк, ел саен бөтен Россия буенча 600дән артык түгел, ә Удмуртиядә бавыр трансплантациясен кичергән 20гә якын пациент яши. Аутоиммун бавыр җәрәхәтләре булган балаларга һәм пациентларга өстенлек бирелә. Уңышлы һәм вакытында ясалган операция пациентның гомерен дистәләгән елларга озайтырга ярдәм итә", - дип билгеләп үтте Алексей Бессонов.
.jpg)