5 нче Чаллы шәһәр хастаханәсе офтальмологлары баш авыртуы булган хатын кызның күзләренә вакытында операция ясаганнар
Чаллыда яшәүче Татьяна Якимова баш авыртуы, аңын югалту күз авырулары нәтиҗәсе икәнен күз алдына да китерми иде.
Татьяна Якимова сөйләвенчә, күзләре елдан-ел начарлана барган, бер күзенә сукырайган. Ләкин ашыгыч операция кирәклеген ул 5 нче шәһәр хастаханәсе табиб-офтальмологларының ышанычлы кулларына эләккәч кенә аңлый.
- Даруханәдән тамчылар ярдәм итәр дип уйлаган идем, ләкин кискен баш авыртуы мине аяктан екты. Мине ашыгыч ярдәм машинасында 5 нче номерлы хастаханәгә алып киттеләр һәм неврология бүлегенә салдылар, - дип уртаклашты 63 яшьлек Татьяна ханым. - Табиб карады һәм шунда ук офтальмология бүлегенә күчерде. Икенче көнне миңа операция ясадылар инде. Табиб-офтальмолог Николай Владимирович Михайловка рәхмәт: ул мине тормышка кайтарды.
"Озакка сузарга ярамый иде. Пациентның катаракта массалары шешү фонында сул күзнең эчке структуралары алга күчеп, икенчел глаукома барлыкка килде - бу күз эчендәге басымның дистәләгән тапкыр артуына, күз тукымаларының (бигрәк тә мөгезкатлауның) шешүенә һәм көчле авырту приступына китерде", - дип аңлатты табиб - офтальмолог.
Интраокуляр линза имплантациясе белән катарактаны бетерү үткәрелгән, сыеклык агымы өчен төсле катлауда өстәмә тишек ясалды. 2 айдан соң - эчке структуралар зарарлануы кабатланмасын өчен, уң күзенә операция ясала. Мондый җитди катлауланулар белән күзләрне саклап калу гына түгел, ә яхшы күрү эффекты алу бик сирәк очракта мөмкин.
Татьяна Петровна әйтүенчә, хәзер ул туганнарының йөзләрен күрә, ә шулай ук кибеткә рәхәтләнеп йөри, алар өчен күчтәнәчләр сайлый, иң вак шрифтны укый ала. Һәм чын күңелдән үз табибына рәхмәт әйтә.