РКХ табиблары Татарстанда беренче тапкыр пациентка үз төп күзәнәкләрен күчергәннәр
Татарстанның Республика клиник хастаханәсендә беренче тапкыр миелома белән авыручы ике пациентка сөяк миен аутотрансплантацияләделәр, дип хәбәр итә клиниканың матбугат хезмәте.
Сөяк миен аутотрансплантацияләү - пациентка үз төп күзәнәкләрен күчерү. Башлыча, пациент сәламәт булмаган күзәнәкләрне басу өчен аз доза химиотерапия ала.
"Алга таба без организмны яңа төп күзәнәкләрен актив җитештерү өчен стимуллаштырабыз. Организм 1 килограмм авырлыкка 5 миллион күзәнәк җитештергәндә, без пациентның үз төп күзәнәкләрен алабыз. Бу күзәнәкләр туңдырыла һәм пациентны өйгә җибәрәләр. 4-5 атнадан соң без пациентны кабат хастаханәгә чакырабыз һәм химиотерапия ярдәмендә барлык күзәнәкләрне үтерәбез. Киләсе тәүлектә пациент стериль шартларда була. Шуннан соң без аңа аның төп күзәнәкләрен кертәбез. Аннары берничә көн дәвамында организм үз күзәнәкләре ярдәмендә сөяк миенең сәламәт күзәнәкләренең бөтен күләмен торгыза", - дип аңлата Татарстан Республикасы РКХ гематология бүлеге мөдире Михаил Кунст.
Сөяк миен аутотрансплантацияләү лимфома, миелома һәм автоимун авырулары өчен медицина ярдәме күрсәтү стандартларына керә. Бүгенге көндә мондый процедураны Мәскәү, Санкт-Петербург, Самара, Киров, Екатеринбург һәм Иркутск клиникаларында ясыйлар.
"Без бу катлаулы вакыйгага бик озак әзерләндек. Аутотрансплантация үткәрү өчен пациентлар да сайлап алына. Процедураның мөмкинлеге ике факторга бәйле: беренчедән, пациент югары дозалы химиотерапиягә түзәргә тиеш, икенчедән, җыеп алынган күзәнәкләр тергезү өчен җитәрлек булырга тиеш. Әгәр бу ике шарт та үтәлсә, без процедура үткәрәбез", - дип өстәде табиб.
Түбән Кама һәм Арчадан килгән беренче пациентлар үзләрен канәгатьләнерлек хис итәләр һәм хастаханәдән чыгуга әзерләнәләр.