Татарстан — сәламәтлек саклауның беренчел звеносын модернизацияләүдә әйдәп баручы төбәк

2024 елның 24 феврале, шимбә

«Сәламәтлек» көне кысаларында Мәскәүдә «Россия» Халыкара күргәзмә-форумында иң яхшы төбәкләрне билгеләп үттеләр.

Россия Федерациясе Хөкүмәте Рәисе урынбасары Татьяна Голикова һәм Россия Федерациясе Сәламәтлек саклау министры Михаил Мурашко «Сәламәтлек саклау» илкүләм проектының беренчел звеносын (2021-2023 еллар) модернизацияләү программасы кысаларында йөкләмәләрен тулысынча үтәгән 10 төбәк-лидер вәкилләренә рәхмәт хатлары тапшырды.
Мактаулы бүләкне Татарстан Республикасы Сәламәтлек саклау министры Марсель Миңнуллин алды.

Программа нәтиҗәләре:

• 71 сәламәтлек саклау объекты төзелгән һәм реконструкцияләнгән;
• 157 бина капиталь ремонтланган;
• 4,8 мең берәмлектән артык медицина җиһазлары һәм 526 берәмлек автотранспорт сатып алынган.