Стоматолог әти сәламәт тешләр кагыйдәләре турында сөйләде
Бүген Кама Тамагы мәктәбендә район үзәк хастаханәсе стоматологы беренче сыйныф укучылары өчен теш сәламәтлеге һәм авыз куышлыгы гигиенасы турында лекция үткәрде.
Чара 20 октябрьдә узачак Әтиләр көне уңаеннан оештырылды. Мәктәп укучысының әтисе үзенең һөнәре турында сөйләде.
1 сыйныф укучылары тешләрне сәламәт тоту кагыйдәләре турында кызыксынып тыңлады.
Гыймадиев Илһам Исмәгыйль улы Кама Тамагы үзәк район хастаханәсендә 22 елдан артык теш табибы булып эшли. Ул югары квалификация категориясенә ия һәм барлык Кама Тамагы халкына киңәшләр бирә: "Тешләрне көнгә 2 тапкыр чистартырга кирәк: иртән иртәнге аштан соң һәм кич йоклар алдыннан. Елга 2 мәртәбә мәҗбүри рәвештә стоматологка барырга кирәк. Моннан тыш, тешләр сәламәтлеге өчен яшелчә һәм җиләк-җимеш ашау да файдалы".
Чара ахырында сыйныфның һәр укучысына теш табибы алма һәм мәгълүмати брошюралар таратты.