Яр Чаллы урологлары йодрык зурлыгындагы простата бизенең шешен алдылар
58 яшьлек шәһәр кешесе сидек куыгыннан кан китү, кискен сидек тоткарлану белән кергән. Табиб-урологлар шунда ук пациентны ашыгыч операциягә әзерли башлаганнар.
Тикшерүләр этабында ук (цистоскопия, УЗИ, КТ, лаборатор тикшеренүләр башкарылган) кан китү чыганагы - сидек куыгы муенының варикозлы киңәюе ачыкланган. Моннан тыш, пациентка зур үлчәмдәге простата аденомасын һәм сидек куыгы гематомасын алырга кирәк була.
Баш хирург, табиб-уролог Рөстәм Абдурахманов һәм 5 нче шәһәр хастаханәсенең урология бүлеге мөдире Дилшат Мөхәммәтшин катлаулы операция ясадылар.
- Безнең тарафтан сидек куыгына эндоскопик ысул белән ревизия ясау турында карар кабул ителде. Операция барышында кан төерләрен алдылар, кан тамырлары белән бергә аденоманы алдылар. Аның үлчәме 120 см3 тәшкил иткән. Ир кешенең зур йодрыгын күз алдына китерегез – нәкъ менә шундый шеш простата бизенең эчендә үскән. Бүген мондый операцияләр простата бизе һәм сидек куыгы шешләрен дәвалауның «алтын стандарты» булып тора, - дип уртаклашты Рөстәм Абдуселимович.
Операция нәтиҗәсе: кан китү тулысынча туктатылган, 4 нче тәүлеккә пациентның уретраль катетеры алынган. Озакка сузылган операциядән соңгы вакыттан башка ул тиз аякка баса һәм өенә кайтарыла. Чаллы кешесе табибларга рәхмәт белдерде һәм ир-ат сәламәтлеген сакларга вәгъдә итте.
Бу ел саен 5 нче номерлы шәһәр хастаханәсе табиб-урологлары күрсәтә торган пациентларны коткару һәм аларга ярдәм итү тарихларының берсе генә. Бүген без аларны һөнәри бәйрәмнәре белән котлыйбыз, нык сәламәтлек һәм уңышлар телибез!
Операция бригадасы:
урология бүлеге мөдире Дилшат Дилшат улы Мөхәммәтшин;
хастаханәнең баш хирургы, табиб-уролог Рөстәм Абдуселим улы Абдурахманов;
табиб-анестезиолог-реаниматолог Виктор Устинович Гессер;
операция шәфкать туташы Красильникова Ольга Александровна;
шәфкать туташы-анестезист Татьяна Александровна Яковлева.