Мамадыш район үзәк хастаханәсендә капиталь ремонттан соң хастаханәнең йогышлы авырулар бүлеге ачылды
Мамадыш районында сәламәтлек саклау өлкәсендә мөһим вакыйга булды. Капиталь ремонттан соң район үзәк хастаханәсенең яңартылган инфекция бүлеге ишекләрен ачты.
Тантаналы ачылышта Татарстан Республикасы сәламәтлек саклау министрының беренче урынбасары Елена Владимировна Демьянова, Мамадыш районы башлыгы Вадим Ильич Никитин, Республика клиник йогышлы авырулар хастаханәсенең оештыру-методик эш буенча баш табиб урынбасары Рөстәм Хәмит улы Фәхретдинов һәм «Мамадыш район үзәк хастаханәсе» ДАССУның баш табибы Руслан Заһир улы Гарипов катнашты.
Ачылыш тантанасында чыгыш ясап, баш табиб Руслан Заһир улы Гарипов Татарстан Республикасы Хөкүмәтенә һәм Сәламәтлек саклау министрлыгына, шулай ук шәхсән республика клиник хастаханәсе баш табибы Марат Ринат улы Гатауллинга ярдәмнәре өчен рәхмәт белдерде.
Мәртәбәле кунаклар башкарылган эшләрнең масштабын һәм сыйфатын шәхсән бәяләделәр. Алар пациентлар өчен яңартылган палаталарны һәм персонал өчен уңайлы эш кабинетларын карадылар, шулай ук бүлеккә килгән яңа медицина җиһазлары белән таныштылар. Объектны модернизацияләүгә 73 млн 104 мең сум акча бүлеп бирелгән.
