Казанда тантаналы рәвештә табибларны – «Сәләт» бөтенроссия бәйгесе җиңүчеләрен каршы алдылар

Бүген «Казан» Халыкара аэропортында  табибларны - «Сәләт» бөтенроссия табиблар бәйгесе җиңүчеләрен каршы алдылар. РКХ табиблары төркеме «Кеше гомерен коткарып калган уникаль операцияне үткәргән өчен» дигән атауда җиңде.
Медик-җиңүчеләрне каршылауда ТР сәламәтлек саклау министры Адель Вафин һәм РКХнең баш табибы урынбасары Сергей Кривошапко катнаштылар.
«Сәләт» бөтенроссия табиблар бәйгесе җиңүчеләрен бүләкләүнең тантаналы церемониясе кичә Мәскәүдә Россия Хөкүмәте Рәисе Дмитрий Медведев, Россия Хөкүмәте Рәисе урынбасары Ольга Голодец, РФ сәламәтлек саклау министры Вероника Скворцова катнашуында булды.
 «Кеше гомерен коткарып калган уникаль операцияне үткәргән өчен» дигән атауда җиңүчеләр булып ТР Сәламәтлек саклау министрлыгы Республика клиника хастаханәсе табиблары төркеме танылды: абдоминаль хирургия бүлеге мөдире Илнур Зәйнуллин, абдоминаль хирургия бүлегенең табиб-хирургы Руслан Зефиров, 1нче реанимация һәм интенсив терапия бүлеге мөдире Александр Ванюшин, анестезиология бүлеге мөдире Кирилл Малыкин.
Бөтенроссия бүләгенә РКХ табиблары 2012 елда уксус серкәсе белән авыр дәрәҗәдә агулану нәтиҗәсендә үңәченең һәм 12-илле эчәгенең химик пешүе булган пациентка үткәрелгән операция өчен лаек булдылар. Хәзер пациент ТР Спасс районы Иске Рәҗәп авылыннан Габдрахманов үзен яхшы хис итә һәм тулы кыйммәтле тормыш белән яши. Ришат Габдрахманов гомерен саклап калу – бу бөтен республика сәламәтлек саклау системасының хезмәте, – дип саный Адель Вафин: фельдшерның вакытында күрсәткән ярдәменнән, Спасс ҮРХдә күрсәтелгән ярдәмнән, санитария авиациясе белән китерүдән башлап РКХдәге операциягә кадәр.
ТР Сәламәтлек саклау министрлыгы башлыгы, «Сәләт» бәйгесендә  татарстан табибларының җиңүе үз тормышларын медицина белән бәйләргә теләүче күп яшь кешеләр өчен этәргеч булачак, – дип билгеләде.

«Татар-информ» МА, Алия Җамалиева