Кояшта ничек пешмәскә?
Урамда кояш кыздырганда, һава температурасы һәм дымлылык югары булганда, җилсез һава торышы кояш сугуга һәм пешүгә китерергә мөмкин. Тән кызарып, авыртса, бу кояшта пешүнең беренче дәрәҗәсе, ә инде кояшта озаграк йөрү пешүнең икенче дәрәҗәсенә китерә – тәндә кабарчыклар барлыкка килә. Ак тәнлеләргә кояшта пешүгә 15-30 минут җитә.
Кояш пешүнең беренче билгеләре зарарланганнан соң 2-6 сәгатьтән соң барлыкка килә.
Кояшта чамасыз кызыну бик җитди нәтиҗәләргә китерергә мөмкин:
— тире яман шеше куркынычын арта;
— авыруларның, бигрәк тире белән бәйле авыруларның кискенләшә;
— катаракта барлыкка килү;
— тотрыклы пигментация;
— вакытыннан алда картаю.
Дөрес кызынуның сере гади – сабырлык һәм әз-әзләп кызыну
- 11 һәм 15 сәгать арасындагы турыдан-туры кояш нурларыннан сакланыгыз.
- Беренче кояш ванналары 15-20 минут булса, аннары 2 сәгатьтән дә артмаска тиеш.
- Хәрәкәттә кызыну хәерлерәк, кояш ванналарын иртән-кич ашаганнан соң 1 сәгать узгач кабул итү яхшырак.
- Ачык төстәге баш киеме киегез. Шулай ук ачык төстәге һәм җиңел тукымалы өс киеме кияргә кирәк
- Балалар турында кайгыртыгыз - 3 яшькә кадәрге балаларга кояшта озак торырга рөхсәт итмәгез, аларны бер минутка да караучысыз калдырмагыз!
- Организм сусызланмасын өчен су, куас, морс эчегез. Баллы эчемлекләр һәм концентрацияләнгән соклар эчү киңәш ителми. Алардан сусау тагын да арта.
- Кызынганда SPF 30 дан 50гә кадәр булган кремнар кулланыгыз.
Дәвалану:
Тәнне дымлатырга, суытырга кирәк. Ромашка чәчәкләре төнәтмәсен суытып компресс куеп, аны 3-5 минут саен алыштырып тотыгыз. Одеколон белән сөртергә ярамый. Зыян күрүче күп күләмдә су эчәргә тиеш. Тәндә кабарчыклар чыккан булса, табибка мөрәҗәгать итегез.
Җәйге кояшта сак булыгыз, үзегезне саклагыз!