Яшел Үзән Үзәк район хастаханәсе эшчәнлеге белән Казан федераль университетының кураторлары танышты
Татарстан Республикасы Сәламәтлек саклау министры Марат Садыйков республика әһәмиятендәге медицина оешмалары арасыннан үзәк район хастаханәләре өчен кураторларны билгеләде.
Кураторлыкның максаты-муниципаль район халкына медицина ярдәмен күрсәтүне камилләштерү мәсьәләләре буенча оештыру-методик эшне гамәлгә ашыру.
Яшел Үзән РҮХнең кураторы итеп «Казан (Идел буе) федераль университеты»ның медик-санитар часте билгеләнде.
Агымдагы елның 29 октябрендә кураторлар - Казан федераль университеты медик-санитар частененең һәм медицина оешмасының әйдәүче белгечләре очрашуы узды.
Очрашу Яшел Үзән хастаханәсендә булды. Кураторлар Яшел Үзән РҮХнең матди-техник базасы белән танышты. Эшлекле очрашу барышында үлүчеләр санын киметү мәсьәләләре турында фикер алышты. Уртак эшчәнлекнең стратегик юнәлешләре, халыкны югары технологияле медицина учреждениеләре базасында тикшерү һәм дәвалау мөмкинлекләре каралды.