Рөстәм Миңнеханов Түбән Камада 192 урынга исәпләнгән кабул итү-диагностика бүлеген төзүне хуплады

2021 елның 20 феврале, шимбә

Түбән Кама  район үзәк күппрофильле хастаханәсенең хирургия корпусында Татарстан Республикасы Президенты Рөстәм Миңнеханов ашыгыч һәм кичектергесез ярдәм үзәге проекты белән танышты. Үзәк  составына кабул итү-диагностика бүлеге керәчәк.

Президент эш сәфәре кысаларында Түбән Кама күппрофильле хастаханәсендә булды. Түбән Кама муниципаль районы башлыгы Айдар Метшин яңа объектны төзү планнары турында  сөйләде. Соңрак, Түбән Кама муниципаль районының социаль-икътисадый үсеш мәсьәләсе буенча киңәшмә барышында Рөстәм Миңнеханов ассызыклаганча, кабул итү-диагностика бүлеген төзү -     статистик мөһим адым. «Быел бу объектны башларга һәм аны ике елда тәмамларга кирәк», -дигән бурыч куйды Президент.

Рөстәм Миңнеханов   билгеләп үткәнчә, бу бурычны үтәү өчен барлык көчләрне – федераль һәм региональ программаларны, сәнәгать предприятиеләрен берләштерергә кирәк. Проект документациясе эшләнгән  тәүлек буе эшли торган стационар 192 урын һәм сменага 200 кешегә исәпләнгән кабул итү-диагностика бүлеген үз эченә ала.

Аннары Рөстәм Миңнеханов 1984 елда төзелгән 3 нче  дәвалау корпусында булды, анда узган ел капиталь ремонтның беренче этабы узган иде. Түбән Кама хастаханә комплексларының стационарларын ремонтлау программасына керде. Шәһәр 2020 елда хастаханәләрне ремонтлауга 300 млн сумнан артык акча алды.

Хирургия корпусында кабул итү-диагностика, анестезиология-реанимация, гинекология, хирургия һәм операция бүлекләре урнашкан. Беренче этап барышында төп операция бүлеге  «чиста бүлмәләр» комплексы белән җиһазландырылган.

Быел башкарылачак капиталь ремонтның икенче этабына республика бюджетыннан 136 млн сум бүлеп бирелгән.