Урыссу үзәк район хастаханәсендә Ачык ишекләр көне үтте
Урыссу үзәк район хастаханәсендә бүген Ачык ишекләр көне узды.
Чарада район белем бирү учреждениеләренең булачак чыгарылыш сыйныф укучылары катнашты.
Кунакларны Урыссу үзәк район хастаханәсенең баш табибы Светлана Шакирова сәламләде.
- Сез бүген һөнәр сайлау алдында торасыз. Әгәр сез язмышыгызны медицина белән бәйләргә карар итәсез икән, сайлаган һөнәрегез һәм пациентның, гаиләгә караганда да, беренче урында торачагын истә тотыгыз. Эшкә чын күңел биргән очракта гына сез чын табиб була алачаксыз, - диде ул.
Ачык ишекләр көненең тагын бер кунагы – Казан дәүләт медицина университетының 3 курс студенты Роман Салафонов өлкән сыйныф укучыларын Казан дәүләт медицина университетының кызыклы һәм күпкырлы тормышы белән таныштырды.
Яшь буын алдында чыгыш тоткан белгечләр Азат Галиев, Кристина Вәлиуллина, Әлфия Хәсәншина, Айгөл Михайлова сәламәтлек саклау өлкәсенә алып килгән юллар һәм тормышларын медицина белән бәйләүләре өчен беркайчан да үкенмәүләрен турында мавыктыргыч итеп сөйләделәр.
Укучылар балалар поликлиникасы, КТ, ЭКГ, УЗИ һәм башка кабинетларның эшчәнлеге белән якыннан таныштылар.
УЗИ кабинеты табибы Сәфилә Хисамова яшь буынга табиб образына керергә, УЗИ аппараты артына утырып, тикшерү уздырып карарга тәкъдим итте.
Ачык ишекләр көне «Ак халатлы фәрештәләр» медицина фестивале кысаларында узды.