Түбән Камада онкология ярдәмен үстерүнең төп юнәлешләре турында фикер алыштылар
Кичә Татарстан Республикасы Премьер-министры Алексей Песошин Татарстан Республикасы сәламәтлек саклау министры Альмир Абашев һәм Республика клиник онкология диспансерының баш табибы Марат Мөхәммәдиев озатуында 4 нче дәвалау корпусында булды.
Визит барышында делегация Түбән Кама район үзәк күп профильле хастаханәсенең амбулатор онкология ярдәме үзәген карады.
Татарстан Республикасы Хөкүмәте башлыгына Республика клиник онкология диспансеры филиалын ачу планнарын гамәлгә ашыру турында сөйләделәр.
Әлеге адым шәһәрдә онкология хезмәтен системалы үстерүгә юнәлдерелгән, хәзерге вакытта ул амбулатор онкология ярдәме үзәген, химиотерапия бүлеген, абдоминаль хирургия бүлеген, гистология лабораториясен һәм күчмә паллиатив бригаданы үз эченә ала. Тулы кыйммәтле онкология диспансерын ачу медицина инфраструктурасын үстерүдә яңа этап булачак, халыкны тулы күләмдә комплекслы һәм һәркем файдалана алырлык махсуслаштырылган медицина ярдәме белән тәэмин итәргә мөмкинлек бирәчәк.
Түбән Кама онкология хезмәте быел Республика онкология диспансеры карамагына күчәчәк.
"Беренче адым шәһәрнең бөтен онкология хезмәтен РКОД белән берләштерү булачак. Без монда хирургия блогын, химиотерапияне, амбулатор онкология ярдәме үзәген, диагностиканы үстерергә кирәк булачагын аңлыйбыз. Старт алдыннан безгә барлык оештыру мәсьәләләрен хәл итәргә кирәк", - дип белдерде Альмир Абашев.
Пациентларны дарулар белән тәэмин итү һәм маршрутлаштыру өстенлекле мәсьәлә булып кала. Яңалыклар кертелгәннән соң, Түбән Кама кешесенә күрше шәһәрләргә медицина ярдәме алырга барырга кирәк булмаячак.
фото – Рәсми Татарстан