Кеше-легенда: Алабуга район үзәк хастаханәсендә Анастасия Евграфовна Дудкинаны якынлашып килүче Җиңү көне белән котладылар
Алабуга район үзәк хастаханәсе баш табибы Александр Попов, профком рәисе Румия Резвякова һәм ветераннар советы рәисе Геннадий Баганов тормышы чын батырлык һәм игелек елъязмасы булган гаҗәеп хатын-кыз янына бардылар. Республика рәисе һәм хакимият башлыгы исеменнән алар якынлашып килүче бәйрәм белән Анастасия Евграфовна Дудкинаны котладылар.
Анастасия Дудкина 1925 елда туган. Иртә әнисез кала, янгын һәм күчеп йөрүләр кичерә. Ә 16 яшендә аның хезмәт тормышы башлана. Сугыш елларында яшь Настя 2 нче Мәскәү сәгать заводында эшли (Чистайга эвакуацияләнгән). Көндез ул Бөрсет урманында ылыслы төнәтмә белән генә тукланып, гасырлар буе үскән наратларны аудара, ә төннәрен цехта фронт өчен миналар җыя. Һәр мина — Җиңүгә таба бер адым икәнен белеп, тәүлек буе йокысыз хезмәт иткәннәр.
Анастасия Евграфовна Чистай сәгать заводына 48 ел багышлады! Ләкин пенсиягә чыгып, 1989 елда Алабугага күчкәч тә, ул эшсез утыра алмаган. Тагын 12 ел ул хастаханәдә — бала тудыру йортында һәм Прикамнефть Медсанчастендә лифтер булып эшләгән.
Хезмәттәшләре һәм пациентлары әлегә кадәр аны искиткеч җылылык белән искә алалар. Ул һәрвакыт башкаларга ярдәм итәргә тырыша: я хезмәттәшләрен төшке ашка үзе җыйган гөмбәле кыздырылган бәрәңге белән сыйлый, я операциядән соң пациентларга, алар тизрәк терелсеннәр өчен, өй киселе әзерли.
Искәртеп узабыз, узган елның ноябрендә бу гаҗәеп хатын үзенең 100 яшьлек юбилеен билгеләп үтте!
Хөрмәтле Анастасия Евграфовна! Сезнең тормыш юлыгыз - ул искиткеч ныклык һәм кешеләргә мәхәббәт үрнәге. Без Сезнең безнең коллективның бер өлеше булуыгыз белән горурланабыз.
Сезгә баш иябез, нык сәламәтлек һәм озын гомер телибез!