ТР сәламәтлек саклау министры Адел Вафин эш сәфәре белән Норлат районына барды

Бүген, 10нчы сентябрьдә, Норлат районында эш сәфәре белән Татарстан Республикасы сәламәтлек саклау министры Адел Вафин булды. Район башлыгы Равил Кузюров һәм Норлат үзәк район хастаханәсенең баш табибы Марат Йосыпов катнашында ул Мамыкта капиталь төзәтелгән табиблар амбулаториясен карады. Монда «Лидер ТКнең» төзүчеләре 4 ай эчендә  2 миллионлык төзү эшләрен алып барды. 2006нчы елдан халыкны кабул иткән амбулатор бинада түбәне алыштырдылар, фасадны җылыттылар, керү группасын ясадылар, «Үтәрлек мохит» программасы буенча эшләр башкардылар. Шулай ук эчке яктан бизәкләүне эшләделәр. Кунаклар Чуваш Мәнҗеледә һәм Чияледә яңа модульле фельдшер-акушер пунктларының ачылыш тантанасында катнаштылар. Торак пунктларның икесендә дә эшләрне график буенча «Азнакайнефтемаш» төзүчеләре башкарды. Республика программасы буенча рекордлы кыска вакыт эчендә эшләнгән пунктларга яңа җиһазлар куелган һәм монда пациентлар өчен барлык шартлар булдырылган.
Ачылыш тантанасында чыгыш ясаган район башлыгы Равил Кузюров республика җитәкчелегенә һәм Сәламәтлек саклау министрлыгына рәхмәт сүзләрен җиткерде, шулай ук районның медицина өлкәсендәге булдырган эшләргә тукталып китте. Ә кешеләргә хәзерге заман ФАПларына профилактик максатлар белән гынә мөрәҗагать итәргә, дип теләде. Норлатлыларның шатлыкларын бүлешкән ТРның сәламәтлек саклау министры Адел Вафин үзенең чыгышында республикада сәламәтлек саклау өлкәсендә эшләнгән эшләргә тукталып китте.
−    Авыл торак пунктларының халкына медицина ярдәмен күрсәтү сыйфатын яхшырту буенча программа безнең республикада гына эшли, − дип билгеләп үтте министр. Әлеге программа республикада 2016нчы елга кадәр дәвам итәчәк. Республика программасы буенча соңгы 2 ел эчендә генә 5 модульле фельдшер-акушер пункты төзелде, ел эчендә 12 ФАПның һәрберсендә 100 мең сумлык төзәтү эшләре алып барылды. Министр яшь кадрларны авыл торак пунктларына җәлеп итү программасына да, профилактик эшләрне көчәйтү кирәклегенә һәм башкаларга тукталып китте.