Чүпрәле районында тагын бер ФАП ачылды

Сәламәтлек саклау оешмаларын модернизацияләү республика программасы буенча Чуваш Бизнәсе авылында яңа фельдшер-акушер пункты ишекләрен ачты. Әлеге көн торак пункты өчен чын бәйрәм иде. ФАПның ачылыш тантанасында Казаннан кунаклар катнашты: Татарстан Республикасы сәламәтлек саклау министры урынбасары Ринат Җәләлетдинов, Татарстан Республикасы Дәүләт Советы законлылык һәм хокук тәртибе комитетының рәисе Шакир Ягудин һәм ТР Дәүләт Советына депутатлыкка кандидат Ринат Гайзатуллин. Зур Аксу торак пунктының башлыгы Алексей Храмов билгеләп киткәнчә, әлеге вакыйганы авыл халкы бик күп еллар дәвамында көтте. Хәзер халыкка медицина ярдәмен күрсәтү уңайлы шартларда һәм хәзерге заман дәрәҗәсендә алып барылачак. Әлеге вакытка кадәр авыл табиблары су белән тәэмин итү булмаган, канализациясез, электр җылытуы кулланылган иске бинада тордылар. Бинаның тузган халәттә булуы аркасында кыш көне бина эчендә температура -15 С кадәр төшә иде.  Модульле ФАПның тантаналы ачылышы белән Чуваш Бизнәсе авылы халкын Чүпрәле муниципаль районының башлыгы Александр Шадриков котлады. Ул авыл халкына нык сәламәтлек теләде һәм әлеге ФАПка профилактик максатларда гына килергә нәсихәт бирде.