Казан дәүләт медицина академиясендә “Традицион медицинаның көнүзәк мәсьәләләре” фәнни-гамәли конференциясе уза

14-15 апрельдә Казан дәүләт медицина академиясендә “Традицион медицинаның көнүзәк мәсьәләләре” дип аталган фәнни-гамәли конференция узачак. Җыенны академиянең неврология һәм рефлексотерапия кафедрасы ТР Сәламәтлек саклау министрлыгы, республиканың традицион медицина буенча белгечләрнең иҗтимагый оешмасы, Традицион Кытай медицинасы үзәге (Казан), Кытай фәннәр академиясенә караган традицион медицинаның төп теориясе институты (Кытай) белән берлектә оештыра.

Конференция ачылышында әлеге институтның президенты Пан Гуй Цзюань чыгыш ясар дип көтелә. Җыенда бу институт вәкилләреннән тыш, Кытай медицинасының Хэйлунзян фармацевтика университетыннан Ю Жи Минның катнашуы көтелә.

Фәнни форумда традицион медицина өлкәсендә Россия һәм Кытай белгечләренең фәнни-гамәли потенциалын үстерү һәм аннан файдалану юллары каралачак, дип хәбәр итә Казан медицина академиясе матбугат хезмәте.