Бөтенрусия офтальмология конференциясе

Казанда “Офтальмологиядә яңа технологияләр” дигән темага Бөтенроссия фәнни-гамәли конференциясе уза. Әлеге традицион медицина конференциясендә быел Татарстанның төрле шәһәрләреннән 300 дән артык табиб-офтальмолог һәм Россиянең төрле төбәкләреннән 100 гә якын кунак катнаша.
Әлеге чараның әһәмияте елдан-ел арта бара. Бу, барыннан да элек, офтальмологиянең үсеше, күз авыруларын дәвалауда яңа методикалар барлыкка килү, шулай ук Россия һәм чит илләрнең әйдәп баручы галим-офтальмологларын җәлеп итеп актуаль темалар буенча фикер алышуга бәйле. Конференциянең төп максаты – уртак тырышлык белән авыр нәтиҗәләргә (сукыраюга кадәр) китерүче куркыныч күз авыруларына каршы көрәштә югары нәтиҗәләргә ирешү. Моңарчы үткәрелгән конференцияләрнең нәтиҗәләре күрсәткәнчә, белгечләр куелган максатларга акрынлап ирешә.
Республика клиник офтальмология хастаханәсенең баш табибы – республиканың баш офтальмологы Айдар Әмировның сүзләренә караганда, Татарстанда глаукомага ясалган операцияләр саны кимегән. Кешеләр күбрәк дарулар белән дәвалана башлаган.
Быел мөгез катлауны күчереп утыртуга бәйле операцияләр саны арткан. Узган ел шундый 30 операция ясалса, быел аларның санын 80 гә җиткерү күздә тотыла.
Быелның гыйнварында Татарстан белгечләре ике яңа аппаратка - өч дулкынлы лазер (шикәр диабеты, глаукома, икенчел катаракта белән авыручыларны дәвалау өчен) һәм компьютер томографына (челтәр катлау һәм күрү нервындагы үзгәрешләрне билгеләргә мөмкинлек бирә) ия булган.
Сүз уңаеннан, республикада халыкка офтальмология ярдәме шәһәр һәм ведомство хастаханәләрендәге 120 кабинетта һәм 5 шәхси клиникада күрсәтелә. Республикада барлыгы 260 табиб-офтальмолог эшли, шуларның 62 се – шәхси клиникаларда.
Конференция кысаларында шулай ук Россия һәм чит илләрнең иң эре фирмаларында җитештерелгән офтальмология җиһазлары һәм дарулар күргәзмәсе эшли.