Казанның Сәламәтлек саклау идарәсен Владимир Филатов җитәкли

2024 елның 24 мае, җомга

Татарстан Республикасы Министрлар Кабинетының 22.05.2024 елгы боерыгы нигезендә, Филатов Владимир Сергеевич Татарстан Республикасы Сәламәтлек саклау министры урынбасары – Казан шәһәре Сәламәтлек саклау идарәсе башлыгы вазыйфасына билгеләнде.
Владимир Филатов хезмәт эшчәнлеген 1993 елда Казан шәһәренең 6 нчы шәһәр клиник хастаханәсендә башлый, 1995-1997 елларда кабул итү бүлмәсе медбраты булып эшли.
1997-2000 елларда – Казан шәһәренең ашыгыч һәм кичектергесез медицина ярдәме станциясендә ашыгыч ярдәм табибы.
2000 елда – Республика балалар клиник хастаханәсендә табиб-нейрохирург. 2014 елда хирургия ярдәме буенча баш табиб урынбасары итеп билгеләнә.
2021 елда Казан шәһәренең «1 нче шәһәр балалар хастаханәсе» ДАССУ баш табибы итеп билгеләнә.