Яр Чаллы Ашыгыч медицина ярдәме хастаханәсенә Ренат Акчурин исеме бирелде
Ренат Сөләйман улы Акчурин атаклы совет кардиохирургы, ул Россиядә һәм Европада беренче булып коронар артерияләргә операция ясаганда югары нәтиҗәле микрохирургия техникасы практикасын гамәлгә керткән. Татарстан Фәннәр академиясенең шәрәфле әгъзасы, шулай ук Башкортстан Фәннәр академиясенең академигы. 1998 елдан доктор югары технологияләр медицинасын үстерү дәүләт программасы белән җитәкчелек иткән булган.
1996 елның ноябрендә профессор РФ беренче Президенты Борис Ельцинга йөрәктә коронар шунтлау операциясен башкарган. Акчурин күп еллар Татарстан белән тыгыз элемтәдә торган һәм ТР Тулы вәкаләтле вәкиллеге карамагындагы табиблар клубын җитәкләгән.
Ашыгыч медицина ярдәме хастаханәсенең баш табибы Марат Мөхәммәдиев: «Ашыгыч медицина ярдәме хастаханәсенең Россиянең генә түгел, бөтен дөньяның иң бөек кардиохирургы исемен горур йөртүе – безнең өчен зур дәрәҗә. Безнең төбәк өчен уникаль булган нәтиҗәлелек һәм казанышларның, шундый искиткеч операцияләрнең һәм диагностика методларының тамырлары кайдан булуын анализласак, бу 2011 елның июле. Ул вакытта Ренат Сөләйманович үзенең командасы белән Ашыгыч медицина ярдәме хастаханәсенә элек Яр Чаллыда булмаган яңа юнәлешне - кардиохирургияне кертеп җибәрү өчен килгән. Безнең шәһәрдә беренче өч аортокоронар шунтлау башкарылды. Бүген ашыгыч медицина ярдәме хастаханәсе хирурглары Ренат Акчурин эшен уңышлы дәвам итәләр».