Васильево поселогының легендар табибы Николай Малиновскийга тантаналы рәвештә мемориаль такта ачтылар
Бөтен гомерен ул медицинага багышлады. ТАССР ның атказанган табибы Васильево район хастаханәсендә 35 ел 80 яшькә кадәр эшләгән. Фронт госпитале белән бөтен Бөек Ватан сугышын узган. Коллегалары өчен үрнәк һәм Васильево халкы өчен зур абруй казанган кеше.
Николай Малиновский истәлегенә мемориаль тактаны Васильево район хастаханәсе бинасына урнаштырганнар. Бу стационарның аның зур тырышлыгы нәтиҗәсендә төзелүе символик мәгънәгә ия.
Сугыш башланыр алдыннан Николай Малиновский рентгенотехник курсларын тәмамлый һәм бу аның бөтен тормышының этәргеч ноктасы була. Бөтен сугышны медицина хезмәтенең кече лейтенанты алгы сызыкта үткәрә. Кызыл Йолдыз ордены һәм «Сугышчан казанышлары өчен» медале белән бүләкләнгән. Сугыштан соң Казан медицина институтын яхшы билгеләргә тәмамлый һәм 1967 елда Васильевога баш табиб булып килә.
Хастаханә белән янәшә зур булмаган өйдә яшәгән, көннең һәм төннең теләсә кайсы вакытында үз пациентларына ярдәмгә ашыга торган булган. Моның өчен аны бик кадерләгәннәр һәм хөрмәт иткәннәр. Николай Малиновский поселок медицинасына 35 ел хезмәт иткән. 20 елдан артык Васильево хастаханәсенең баш табибы булган.
Аның эше Васильевода сәламәтлек саклау үсешенә этәргеч бирә. Аның җитәкчелегендә хастаханәнең дүрт катлы корпусы төзелә, ул 1980 елның 1 гыйнварында ачыла һәм моңа кадәр бөтен бистә буйлап сибелгән бүлекләрне берләштерә.
Ул туган хастаханәсенә ахыргача тугры кала. Һәм хәтта операция ясаудан туктагач та, җиңел генә квалификациясен үзгәртә һәм 80 яшькә кадәр физиотерапевт булып эшли!
Хәтер митингына аның элеккеге хезмәттәшләре һәм пациентлары җыелды. Аны остаз, өлкән иптәш, үрнәк итеп санаучылар. Кайчандыр ул гомерләрен саклап калган кешеләр.
Чараның мәртәбәле кунаклары Татарстан сәламәтлек саклау министры урынбасары Вера Семенова һәм Яшел Үзән районы башлыгы Михаил Афанасьев булды. Легендар докторның туганнарына аерым роль бирелде.
Бүген Малиновскийларда инде өченче буын медиклар эшли. Николай Михайловичның улы, атасы кебек хирург, медицина фәннәре кандидаты. Оныгы Ольга Республика клиник хастаханәсенең утратавыш диагностикасы табибы, оныгы Николай бабасының тулы адашы, РКХ табиб-урологы.
Николай Малиновский 96 яшькә кадәр яшәгән һәм үзеннән соң лаеклы мирас калдырган. 2013 елда аңа Яшел Үзән районының Мактаулы гражданины исеме бирелде. Бүген аның портреты шәһәрнең Мактау тактасын бизи.