Россия табиблары Казанда туберкулезны диагностикалауның инновацион ысуллары турында фикер алыша

2025 елның 4 июле, җомга

Бүген Казанда "Балаларда һәм өлкәннәрдә туберкулез. Диагностикалауның инновацион ысуллары" дигән фәнни-гамәли конференция уза. Аның эшендә Татарстаннан һәм Россиянең берничә шәһәреннән (Мәскәү, Саратов, Чабаксар һ.б.) фтизиатрлар катнаша.

ТР сәламәтлек саклау министры урынбасары – Казан шәһәренең Сәламәтлек саклау идарәсе башлыгы Владимир Сергеевич Филатов: "Бу юнәлештә медикларның эшен бәяләп бетергесез. Без соңгы 10 елда авыручылар санының 2 тапкырга кимүен һәм үлүчеләр санының 5 тапкырга диярлек кимүен күрәбез. Без туберкулез буенча төп эпидемиологик күрсәткечләрне тотрыклыландыра гына түгел, яхшырта да алдык. Безгә, Казанга, тәҗрибә уртаклашу өчен Россиядән табиблар килүе шатландыра".