Республика балалар клиник хастаханәсендә фән һәм инновацияләр советы утырышы
Совет утырышын Республика балалар клиник хастаханәсенең баш табибы ачып җибәрде, ул фәнни казанышларны көндәлек клиник практикага кертүнең мөһимлеген ассызыклады.
"Республика балалар клиник хастаханәсе һәрвакыт медицина фәненең авангардында булырга омтылды, - дип билгеләп үтте Айрат Зиатдинов. - Бүген дә, технологияләрнең бик тиз үсүе һәм балалар организмы турындагы белемнәрнең киңәюе шартларында, фән һәм инновацияләр буенча советның роле аеруча зур әһәмияткә ия. Безнең бурыч – өр-яңа эшләнмәләрне күзәтеп бару гына түгел, аларны эшкә актив кертү, безнең кечкенә пациентларга күрсәтелә торган ярдәмнең сыйфатын яхшырту».
Баш табиб урынбасарлары клиникада гамәлгә ашырыла торган фәнни проектларга күзәтү ясадылар, генетик тикшеренүләр һәм персональләштерелгән медицина өлкәсендәге перспектив юнәлешләргә игътибар иттеләр.
Сирәк очрый торган генетик авыруларны иртә диагностикалауның яңа методларын эшләүгә багышланган тикшеренү нәтиҗәләре тәкъдим ителде, бу дәвалауны вакытында башларга һәм мондый патологияле балалар өчен фаразларны яхшыртырга мөмкинлек бирә.