Яр Чаллы онкология үзәге Төркия клиникасы белгечләрен кабул итте
Яр Чаллы клиник онкология диспансеры халыкара хезмәттәшлекнең яңа дәрәҗәсенә күтәрелә.
Шәһәр тарихында беренче тапкыр диспансер эшенә Төркиядән коллегалар кушыла – «Анадолу» клиникасы, күп профильле әйдәп баручы онкология учреждениеләренең берсе.
Төркия онкологлары визиты кысаларында катлаулы клиник очраклары булган 10 пациент консультацияләр алды. Көндезге кабул итү онкодиспансер базасында, тәрҗемәчеләр катнашында узды.
Хәзер онкодиспансер табиблары чит илдәге хезмәттәшләре белән киңәшләшә алачак. Баш табиб Алмаз Хаҗиев билгеләп үткәнчә, проект шәһәр медицинасы өчен яңа мөмкинлекләр ача:
"Бу системалы эшнең башы һәм безнең көндәлек эшчәнлегебездә иң яхшы халыкара практикаларны кертүгә таба адым".
Хезмәттәшлек көндезге кабул итүне һәм дистанцион консультацияләрне үз эченә ала. Пациентларның медицина документлары төрек теленә тәрҗемә ителә һәм «Анадолу» клиникасы экспертларына җибәрелә, алар бәяләмәләр һәм киңәшләр әзерлиләр.
"Онкология диагнозы булган теләсә кайсы пациент икенче фикер өчен мөрәҗәгать итә ала. Мондый практика дөньяда күптән таралган, һәм хәзер ул Яр Чаллыда яшәүчеләргә дә мөмкин», - дип сөйләде «Анадолу» медицина үзәгенең халыкара бүлеге табибы Марат Шәймәрданов.
Медицина фәннәре докторы, онколог Синан Карааслан ассызыклаганча, сөт бизе яман шешен профилактикалауга һәм иртә ачыклауга аерым игътибар бирелә.
