Академик М.И. Перельман исемендәге торакаль хирургия буенча Россия-Европа белем бирү симпозиумы бүген Казанда ачылды
Бөтен Россиядән торакаль хирурглар бүген Татарстан Республикасы клиник хастаханәсе базасында урнашкан Амтек мәгариф үзәгендә тәҗрибә уртаклашырга һәм яңа методикаларга өйрәнергә җыелдылар.
РКХ эндоскопия бүлеге мөдире Марат Назмеев һәм травма үзәге җитәкчесе, ТР Сәламәтлек саклау министрлыгының штаттан тыш баш торакаль хирургы Михаил Бурмистров Мәскәү фәнни онкология институтының торакаль бүлеге мөдире Олег Пикин белән берлектә түбәндәге операцияләрне үткәрәләр:
- кардия ахалазиясе (азык хәрәкәт иткәндә үңәчнең аскы өлеше җитәрлек дәрәҗәдә йомшармый торган авыру) һәм Ценкер дивертикулы (үңәч белән тоташкан урында йоткылыкның арткы стенасы чыгып тору) булган пациентларга эндоскопик операцияләр;
- Ниссен буенча фундопликация (гастроэзофагеаль рефлюкс авыруын һәм диафрагманың үңәч тишегендәге бүсерне дәвалау өчен лапароскопик операция).
РКОДда экспертлар шешләрне алу буенча дүрт операция уздырган, шул исәптән робот ярдәмендә. 27 һәм 28 февральдә белгечләр үпкәләрдә шешләр, күкрәктән кыйпылчыклар алу, диагностика, төрле җәрәхәтләр һәм пациентны команда белән дәвалау турында докладлар белән чыгыш ясаячак.
