Наркодиспансерның «Большие Ключи» реабилитация үзәге 20 еллыгын билгеләп үтте

2026 елның 24 апреле, җомга

Быел «Большие Ключи»  реабилитация үзәге — Республика клиник наркология диспансерының озак вакытлы медик-социаль тернәкләндерү бүлеге — 20 еллык юбилеен билгеләп үтә!

Әлеге мөһим датага багышланган тантаналы чарага хөрмәтле кунаклар: Татарстан Республикасы Дәүләт Советы депутаты Рузилә Тимергалиева, КДМУның «Фармэксперт» РНИЦ җитәкчесе Разия Садыйкова, Россия психотерапия ассоциациясе вице-президенты Сергей Подсадный, руханилар вәкилләре һәм башка чакырылган кунаклар җыелды.

"20 ел  – меңнәрчә коткарылган гомерләр, меңнәрчә бәхетле гаиләләр, табиб-наркологларның, психологларның, психотерапевтларның һәм социаль хезмәткәрләрнең йөзләрчә мең эш сәгате. Биредә сәламәтләнү, спорт һәм иҗат белән шөгыльләнү өчен барлык шартлар да тудырылган. Пациентларыбызның озакка сузылган ремиссиясе  –  «Большие Ключи» коллективы казанышы",  –  дип билгеләп үтте Республика клиник наркология диспансеры баш табибы Ренат Үткелбаев.

Үзәк тарихы 2006 елда, Татарстан Республикасы Министрлар Кабинеты карары нигезендә, Большие Ключи авылында наркодиспансер структурасында яңа бүлекчә барлыкка килгәч башлана. Бу төбәктә бәйлелекләре булган кешеләр өчен озак вакыт тора торган беренче социаль-реабилитация бүлеге булды. Милье-терапиягә — шәхесне торгызу процессына һәр хезмәткәр җәлеп ителгән махсус дәвалау мохите булдыруга нигезләнгән методка аерым игътибар бирелә.

Бәйрәмгә кайчандыр биредә дәваланган һәм бүген тулы канлы тормыш белән яшәүчеләр дә килгән иде. Алар үзләренең уңышлы тарихлары белән уртаклаштылар һәм коллективка ярдәмнәре һәм профессиональлекләре өчен рәхмәт белдерделәр.

Юбилей уңаеннан пациентлар бәйрәм концерты әзерләделәр: автор җырлары, шигырьләр, сәхнә номерлары яңгырады — барлык кунаклар өчен ихлас иҗади бүләк.