Баланы имезү: Биектау район үзәк хастаханәсе табиб-педиатры белән катлаулы мәсьәләләрне тикшерәбез
Имезү – һәр ана һәм сабый тормышында иң мөһим этапларның берсе. Биектау амбулаториясенең участок табиб-педиатры Наилә Камалетдинова имезүгә каршы күрсәтмәләр, даруларның сөт сыйфатына тәэсире һәм имезүче әнинең дөрес туклануы турында сөйләде.
- Имезүгә каршы күрсәтмәләр бармы?
- Әйе, ләкин алар алай күп түгел, һәм абсолют һәм чагыштырмалыларны аеру мөһим.
Ана ягыннан ВИЧ-инфекция, туберкулезның ачык формасы, аеруча куркыныч инфекцияләр, кискен психик тайпылышлар һәм лактация белән ярашмый торган препаратлар кабул итү абсолют каршы күрсәтмәләр булып тора. Чагыштырмача каршы күрсәтмәләргә эклампсия, бала тугач кан китү һәм йөрәк, үпкә, бөер, бавырның хроник авырулары кискенләшү керә.
Бала ягыннан каршы күрсәтмәләр матдәләр алмашының нәселдән килгән бозылуларын үз эченә ала.
Имезү вакытында туклану, өстәмә витаминнар кирәкме?
- Нигез – баланслы һәм төрле рацион. Аңа аксым чыганаклары (майсыз ит, кош-корт, балык, кузаклылар), файдалы майлар (балыкның майлы сортлары, чикләвекләр, үсемлек майлары), катлаулы углеводлар (бөтен кыяклылар), шулай ук яшелчәләр, җиләк-җимешләр, сөт продуктлары керергә тиеш. Баланы имезгәндә энергиягә ихтыяҗ уртача 330-400 ккалга арта.
Өстәмәләргә килгәндә: аларны үзеңә мөстәкыйль билгеләргә кирәкми. Табиб конкрет күрсәтмәләр булса, өстәмәләр кулланырга тәкъдим итә ала. Беренче чиратта тулы кыйммәтле рационга омтылырга кирәк, ә биологик актив өстәмәләрне табиб кушуы буенча гына кабул итәргә кирәк.