Тармакның төп казанышлары турында Дәүләт Советында сәламәтлек саклау министры Альмир Абашев сөйләде
Бүген республиканың сәламәтлек саклау министры Альмир Абашев Татарстан Дәүләт Советында гражданнар сәламәтлеге торышы турында Министрлар Кабинеты мәгълүматы белән чыгыш ясады.
Докладның төп тезислары:
Республика Россия субъектлары арасында халык саны буенча сигезенче урында тора, шул ук вакытта хатын-кызлар күбрәк.
Барлык авырулар структурасында иң зур өлешне кан әйләнеше системасы, сөяк-мускул системасы, сулыш һәм ашкайнату органнары авырулары тәшкил итә.
"Хроник авыруларның иң югары таралуы эшкә яраклы яшьтән өлкәнрәкләр арасында теркәлә, анда һәркайсында уртача 2-3 хроник авыру бар. Балалар һәм яшүсмерләрдә хроник авыруларның киң таралуы да игътибарны җәлеп итә», - дип билгеләп үтте Альмир Абашев.
Бүген республикада авыл халкына медицина ярдәме 43 район үзәк хастаханәсе көче белән башкарыла,
алар составында 1 мең 663 ФАП эшли.
Аларның 334 е капиталь ремонтка мохтаҗ.
2026 елда 16 районда 33 ФАПны 150 миллион сумга ремонтлау планлаштырыла.
Республикада 27 күчмә мобиль комплекс эшли, шуларның 5 се – мобиль поликлиникалар, алар ярдәмендә авылга югары технологияле медицина үзәкләре белгечләре чыга.
«Быел алар 90 меңгә якын кеше кабул итте, - дип ассызыклады Альмир Абашев. - Соңгы 5 ел эчендә мобиль поликлиникалар 775 торак пунктка барып, 190 мең пациентны карап чыктылар, 326 мең кеше кабул ителде, 25 мең 145 яңа авыру ачыкланды».
Сәламәтлек саклау министры һәр баланың уртача 1-2 хроник авыруы булуын билгеләп үтте. Сулыш, ашкайнату һәм күз органнары авырулары иң зур өлешне алып тора. Шул ук вакытта балалар үлеме күрсәткечләре ел саен кими.
«Өлкән яшьтәге балаларның үлем сәбәпләре структурасында йогышлы авырулар, ашкайнату, сулыш органнары, эндокрин система авырулары өлеше кимеде, - дип сөйләде Альмир Абашев. - Моңа хроник авырулы балаларны вакытында диспансер күзәтүе һәм скрининглар һәм профилактик тикшерүләр этабында иртә диагностика ясау хисабына ирешелде. 2025 елда профилактик тикшерүләр барышында балаларда беренче тапкыр 200 меңгә якын авыру ачыкланган".
Халык арасында үлүчеләр санын киметүдә профилактик чаралар төп инструмент булып кала, дип билгеләде Татарстан сәламәтлек саклау министры.
2025 елда республика халкының яртысы Диспансеризация һәм профилактик медицина тикшерүе узган.
Шунысын да билгеләп үтәргә кирәк, профилактик эшнең планлы күләмнәре 2019 ел белән чагыштырганда 2 мәртәбә артты.
«2025 елда беренче тапкыр профилактик чаралар барышында 108 меңнән артык авыру ачыкланды, аларның 85% ы диспансер күзәтүенә алынды, - дип сөйләде депутатларга Альмир Абашев. - 1 мең 524 яңа яман шеш очрагы расланган. Тикшерелгәннәрнең 20% тан артыгы гына сәламәт дип танылган. Өстәмә рәвештә һәр 10 нчының теге яки бу авыру үсеше куркынычы ачыкланган».
Министр шулай ук медицина инфраструктурасын үстерү турында сөйләде.
2025 елда республикада 10 миллиард сумнан артык суммага 288 сәламәтлек саклау объекты төзелде һәм ремонтланды, 2 мең 330 берәмлек җиһаз һәм 180 берәмлек автотранспорт сатып алынды.
Татарстанда, дәүләт статистикасының оператив мәгълүматларына караганда, барлыгы 15 меңнән артык табиб һәм 38 мең урта медицина хезмәткәре эшли.