Авыртуны бер тамчыга гына булса да киметү. РКХнең нейрохирурглары спастика белән авыручылар өчен проблемаларның чишелешен таптылар

Сәламәтлек хезмәте
Аның скрипкачы буласы, зур оркестрда уйныйсы килә иде. Хыялы чынга ашты, ләкин инсульт аркасында шатлыклы киләчәккә нокта куелды. Хәрәкәте чикләнгән сул кул кыл инструментларында тавыш чыгару өчен кулланыла торган кыллар тарттырылган таякны нык һәм шул ук вакытта йомшак итеп тота алмый иде инде … Әмма ул барыбер бирешмәде һәм музыканы ташламады. Бүген ул көйләүче булып эшли, «скрипка»ны ишетү сәләтенең камил булуы аркасында ул югары класслы һөнәр остасына әйләнде. Кулын озак, интектергеч күнегүләр ясап тыңлатты. Ә якынча бер ел элек РКХнең нейрохирурглары аңа затлы бүләк бирделәр, шул бүләк ярдәмендә аның хәрәкәтләренең саны күп тапкырга артты...
Бары хәрәкәтләрнең иркен булмавын тоеп караган кеше генә бу бүләкне тулысынча бәяли ала …
– Юк, бу бүләк түгел, – дип, РКХнең 1нче нейрохирургия  бүлеге мөдире Тимур Бикмуллин ситуацияне ачыкларга ашыга. – РФдә расланган программа буенча, помпаларның – спастикалы, мускулларның артык көчәнеше булган авырулар өчен махсус җайланмаларның билгеле бер санын алырга Татарстанның квотасы бар.
– Корсактагы тире астына тегелгән һәм очында титан катетеры булган юка силикон трубка ярдәмендә умырткалык белән тоташтырылган помпа пациентның арка миен кирәкле препарат белән туктаусыз тәэмин итә ала, – ди Тимур Альберт улы. – Аны, дозасына карап, өч-алты айга бер тутырып торалар. Аны тугыз-ун елдан алмаштыралар. Кыйммәт булуына карамастан, ә помпа якынча миллион сум тора, программа чикләрендә аны пациентларга бушлай куялар.
Без бу помпалар белән дүртенче ел эшлибез, елга унга кадәрне куябыз. Бүген РКХдә диспансер исәбендә умырткалык травмалары булган 2784 пациент тора, һәм аларның ким дигәндә ун процентына шундый помпа кую кирәк. Тагын шулай ук параличланган һәм спастикага дучар ителгән инсультлы авырулар бар.
2821 бала ДЦП белән диспансер исәбендә тора.
Мәкалә авторы: АРСЕНТЬЕВА Светлана
Дата: 05.08.2014
Сан: №112 (27726)